|
Просьба закрепить эту тему, ибо важная.
Выкладываю нормальный текст Канона за болящего из печатного молитвослова. Понадобился тут как-то и с удивлением обнаружил, что Сеть выдает отличную версию от той, что у меня, на каком-то новоцерковнорусском языке. Тем более странно, что на вполне церковных ресурсах лежит.
Канон за болящего читается как молитвенное последование о выздоровлении за того, кто не может сам по каким-либо причинам молиться, в том числе и по причине малоцерковности. После слов "боялящего" добавляется имя того, за кого молимся и в случае женщины соответственно меняется на женский род в нужных местах.
Канон за болящего
Моли́твами свя́тых оте́ц на́ших, Го́споди Иису́се Христе́ Бо́же наш, поми́луй нас. Ами́нь.
Святы́й Бо́же, Святы́й Кре́пкий, Святы́й Безсме́ртный, поми́луй нас. (Читается трижды, с крестным знамением и поясным поклоном.)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй. (Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, Иже еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго. Аминь
Го́споди, поми́луй. (12 раз)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Прииди́те, поклони́мся Царе́ви на́шему Бо́гу. (Поклон)
Прииди́те, поклони́мся и припаде́м Христу́, Царе́ви на́шему Бо́гу. (Поклон)
Прииди́те, поклони́мся и припаде́м Самому́ Христу́, Царе́ви и Бо́гу на́шему. (Поклон)
Псалом 50-й
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́ и от греха́ моего́ очи́сти мя. Яко беззако́ние мое́ аз зна́ю и грех мой пре́до мно́ю есть вы́ну. Тебе́ еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши внегда́ суди́ти Ти. Се бо в беззако́ниях зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Яко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н: се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Канон, глас 3-й
Песнь 1
Ирмос: Пресека́емое мо́ре жезло́м дре́вле, Изра́иль про́йде я́ко по пусты́ни, и крестообра́зно я́ве, предуготовля́ет стези́. Сего́ ра́ди пои́м во хвале́нии чу́дному Бо́гу на́шему, я́ко просла́вися.
Припев: Ми́лостиве Го́споди, услы́ши моли́тву раб Твои́х, моля́щихся Тебе́.
В день печа́ли наше́дшия на ны, к Тебе́, Христе́ Спа́се, припа́дающе, Твоея́ ми́лости про́сим. Облегчи́ боле́знь раба́ Твоего́, реки́ нам, я́ко и со́тнику: иди́, се здрав есть о́трок твой.
Ми́лостиве Го́споди, услы́ши моли́тву раб Твои́х, моля́щихся Тебе́.
Мольбы́ и моле́ния приносящее, с воздыха́нием и верою к Тебе́ вопие́м: Сы́не Бо́жий, поми́луй нас и воздви́гни от одра́ лежа́щаго, я́коже разсла́бленнаго сло́вом, рекий: возьми́ одр твой и отпуща́ются греси́ твои́.
Слава: Твоего́, Христе́, о́браза подо́бию покланя́ющеся, сего ве́рою лобзаем, и боля́щему здра́вия про́сим, подража́юще кровоточи́вей, я́же воскрилию риз Твои́х прикосну́вшися исцеле́ние неду́га прия́ла есть.
И ныне: Пречи́стая Госпоже́ Богоро́дице, всем изве́стная Помо́щнице, не пре́зри нас к Тебе́ припа́дающих, но моли́ я́ко бла́гая Сы́на Своего и Бо́га на́шего пода́ти здра́вие боля́щему, да Тя с на́ми прославля́ет.
Песнь 3
Ирмос: Иже от не су́щих вся приведы́й, сло́вом созида́емая, соверша́емая Ду́хом, Вседержи́телю Вы́шний, в любви́ Твое́й утверди́ мене́.
Ми́лостиве Го́споди, услы́ши моли́тву раб Твои́х, моля́щихся Тебе́.
Иже от тя́жких боле́зней на земли́ пове́ржен к Тебе́, Христе́, на́ми вопие́т, пода́ждь здра́вие телеси́, я́коже Иезеки́и, пла́кавшуся к Тебе́.
Ми́лостиве Го́споди, услы́ши моли́тву раб Твои́х, моля́щихся Тебе́.
При́зри, Го́споди, на на́ше смире́ние и не помяни́ беззако́ний на́ших, но ве́ры ра́ди боля́щаго, я́ко прокаже́ннаго сло́вом, исцели́ , да Твое́, Христе Бо́же́, сла́вится и́мя.
Слава: Це́ркви, ю́же еси́ освяти́л, Христе́, не даждь поноше́ния, но воздви́гни неви́димо на одре́ болезни лежа́щаго, о не́йже мо́лим ти ся: да не реку́т неве́рнии, где есть Бог их.
И ныне: К Тебе, Богоро́дице, о ру́це возде́юще вопие́м: услы́ши раб Твои́х моли́тву и спаси́ в недузе лежа́щаго, да от боле́зни воста́в, возда́ст обе́ты, я́же в печа́ли глаго́лаша уста́ его́.
Го́споди, поми́луй. (Трижды)
Седален, глас 8-й
Якоже древле воздви́гл еси́ Петро́ву те́щу и спасл еси разсла́бленнаго носи́ма на одре, та́ко и ны́не посети́, Ми́лостиве, боля́щаго раба Твоего; Ты бо един еси понесы́й неду́ги ро́да на́шего. Тебе́ Еди́наго ве́мы, терпели́вого и милосе́рдого и милостивого врача́ душ и телес, Христа́ Бо́га на́шего, наводя́ща неду́ги и па́ки возставляющего, подава́ющего проще́ние ка́ющимся о согреше́ниих, Еди́наго Милосе́рде и Всеми́лостиве.
Слава: Аз гре́шный пла́чуся на одре́ мое́м лежа́, проще́ние пода́ждь, Христе́ Бо́же, грехом моим, яже от юности моея сотворих, и от болезни мя воздвигни, да славлю Тя Единого Всемилостивого душ и телес врача.
И ныне: Умилосе́рдися Владычице,и воздви́гни мя от одра́ боле́зненнаго, крепость бо моя́ во мне изнемо́же и весь неча́янием одержи́м есмь, Ма́ти Бо́жия Пречи́стая, исцели́ мя неду́гующа лю́те, Ты бо еси́ Помо́щница христиа́ном.
Песнь 4
Ирмос: Положи́л еси́ к нам тве́рдую любо́вь, Го́споди, Единоро́днаго бо Твоего́ Сы́на за ны на смерть дал еси́. Те́мже Ти зове́м благодаря́ще: сла́ва си́ле Твое́й, Го́споди.
Ми́лостиве Го́споди, услы́ши моли́тву раб Твои́х, моля́щихся Тебе́.
Тебе, Творче, молимся, все грехи раба Твоего прости, не хощеши бо смерти грешного; оживи и уздрави его болезнующего, да восстав послужит Ти, исповедая с нами Твою благость.
Ми́лостиве Го́споди, услы́ши моли́тву раб Твои́х, моля́щихся Тебе́.
Уже́ отча́яннаго лю́тым неду́гом и к сме́рти прибли́жившагося возврати́, Христе́, на живо́т и даждь пла́чущимся уте́шение, да вси прославля́ем Твоя́ свята́я чудеса́.
Слава: Сле́зы Манасси́ины, ниневи́тян покая́ние, Дави́дово испове́дание прии́м, вско́ре сих спасл еси́, и на́ши моли́твы ны́не приими́, благосерде Господи, и подаждь здра́вие боля́щему, о не́мже Тя мо́лим.
И ныне: Пода́ждь нам Твою́ ми́лость, Госпоже́, всегда́ на Тя наде́ющимся, испроси́ здра́вие боля́щему, враче́бнии Твои́ ру́це с Предте́чею, Богоро́дице, ко Христу Бо́гу простира́ющи.
Песнь 5
Ирмос: На земли́ неви́димый яви́лся еси́, и челове́ком во́лею сожи́л еси́ непости́жимый, и к Тебе́ у́тренююще, воспева́ем Тя, Человеколю́бче.
Ми́лостиве Го́споди, услы́ши моли́тву раб Твои́х, моля́щихся Тебе́.
Дщерь Иаи́рову уже́ уме́ршую, я́ко Бог оживи́л еси́, и ны́не возведи́, Христе́ Бо́же, от врат сме́ртных боля́щаго, Ты бо еси́ всем путь живота.
Ми́лостиве Го́споди, услы́ши моли́тву раб Твои́х, моля́щихся Тебе́.
Сы́на вдови́ча оживи́в, Спа́се, и тоя́ сле́зы преложи́л на ра́дость, и ныне спаси́ неду́гом тле́ющаго раба́ Твоего́, да и на́ша скорбь и боле́знь на ра́дость прии́дет.
Слава: О́гненная боле́знь иногда, Христе, те́щи Петрове прикоснове́нием Твоея руки исцеле, и ны́не таяжде всесильная Твоя десница да возста́вит боля́щаго раба́ Твоего́, да возста́в я́ко же и сия, послу́жит Тебе.
И ныне: В скорби сущи гре́шнии, и не иму́щии к Богу дерзнове́ния, к Тебе́, Пречи́стая Богома́ти, вопие́м: моли́ Сы́на Твоего́ пода́ти боля́щему здра́вие душевное же и телесное.
Песнь 6
Ирмос: Бе́здна после́дняя грехо́в обы́де мя, и исчеза́ет дух мой: но простры́й, Влады́ко, высо́кую Твою́ мы́шцу, я́ко Петра́, мя Упра́вителю, спаси́.
Ми́лостиве Го́споди, услы́ши моли́тву раб Твои́х, моля́щихся Тебе́.
Бе́здну ми́лости име́я, Христе́ Бо́же, услы́ши моле́ния раб Твои́х. И якоже Петро́м Тави́фу воскреси́л еси, сице и ныне в боле́зни лежа́щаго воздви́гни, послу́шав церко́вныя моли́твенники.
Ми́лостиве Го́споди, услы́ши моли́тву раб Твои́х, моля́щихся Тебе́.
Врачу́ душ и телес на́ших, понесы́й неду́ги всего́ ми́ра, Христе́, Ене́я Петром исцели́вый и Евтиха Павлом воскресивый , и ны́не боля́щаго исцели́, святы́х апо́стол моли́твами.
Слава: Преложи́, Христе́, на ра́дость рыда́ние о неду́жнем ныне скорбя́щих, да Твою́ получи́вше ми́лость, вни́дем в дом Твой, со обе́товаными дары, сла́вяща Тя со Отцем и Духом во единем существе Нераздельного Бога
И ныне: Прииди́те, о дру́зи, припадем к Бо́жией Ма́тери. Та бо имать власть неду́жныя исцеля́ти, с безме́здникома вку́пе, духо́вным помазу́юще молитв Своих богоприятным елеем
Го́споди, поми́луй. (Трижды)
Кондак, глас 3-й
Ду́шу мою́, Го́споди, во гресе́х вся́ческих, безме́стными дея́ньми разсла́блену, воздви́гни Боже́ственным Свои́м человеколю́бием, я́коже и разсла́бленнаго воздви́гл еси́ дре́вле, да зову́ Ти спаса́ем: ще́дре Христе́, даждь ми исцеле́ние.
Икос
Иже руки́ Своея́ го́рстию содержа́й концы́, Иису́се Бо́же, Иже Отцу́ Собезнача́льный и Ду́ху Свято́му совлады́чествуя, я́ко пло́тию, яви́лся еси́, неду́ги исцеля́я, и стра́сти очи́стил еси́, слепы́я просвети́л еси́, и разсла́бленнаго сло́вом Боже́ственным совозста́вил еси́, сего́ пра́во ходя́ща сотвори́в, и одр повеле́л еси́ на ра́мо взя́ти. Те́мже вси с ним воспева́ем и пое́м: ще́дре Христе́, даждь ми исцеле́ние.
Песнь 7
Ирмос: Пре́жде о́бразу злато́му, перси́дскому чти́лищу о́троцы не поклони́шася, трие́ пою́ще посреде́ пещи́: отце́в Бо́же, благослове́н еси́.
Ми́лостиве Го́споди, услы́ши моли́тву раб Твои́х, моля́щихся Тебе́.
Креста Твоего, Господи, Животворного, имже смерть поги́бе и ме́ртвии оживотворени быша, божественным знамением, ны́не боля́щаго исцели́ я́коже при Еле́не у́мершую деви́цу.
Ми́лостиве Го́споди, услы́ши моли́тву раб Твои́х, моля́щихся Тебе́.
До́лгую, Господи, и лю́тую боле́знь Иовлю, на гно́ищи в че́рвях седящего и благодарне моля́щася, слово́м исцели́л еси́. И ны́не болезнующего и нами молящегося Тебе , яко благ, исцели невидимо молитвами святых твоих.
Слава: Вси ве́мы, я́ко всяку умре́ти нам есть, Тебе́ Бо́гу та́ко изво́лившу, но на ма́лое вре́мя, Ми́лостиве, здра́вия про́сим боля́щему, премени́ от сме́рти того на живо́т, подаждь скорбя́щим уте́шение.
И ныне: Посо́бствуй и помога́й на́шей нищите, Богоро́дице, Ты бо ве́си вре́мя и час, когда́ умоли́ти Сы́на Твоего́ и Бо́га на́шего, пода́ти боля́щему здра́вие и проще́ние всех согрешений.
Песнь 8
Ирмос: Служи́ти живо́му Бо́гу в Вавило́не о́троцы претерпе́вше, о мусики́йских орга́нех неради́ша, и посреде́ пла́мени стоя́ще, боголе́пную песнь воспева́ху, глаго́люще: благослови́те вся дела́ Госпо́дня Го́спода.
Ми́лостиве Го́споди, услы́ши моли́тву раб Твои́х, моля́щихся Тебе́.
Наказуя наказал еси, Влады́ко, боле́знию раба́ Твоего́, и ско́ро исцели́, ми́лостиве Христе́ Бо́же, и еще́ сме́рти не преда́ждь су́дней, да Ти покая́ние возда́ст. Сам бо рекл еси́: не хощу́ сме́рти гре́шного.
Ми́лостиве Го́споди, услы́ши моли́тву раб Твои́х, моля́щихся Тебе́.
Го́споди ми́лостиве, Твоя́ пресла́вная чудеса́ и до нас ны́не дости́гнут: бе́сы прожени́, неду́ги и ра́ны исцели́, боле́зни уврачу́й, потво́ры и чароде́яния, и вся́кие я́зи изба́ви ны.
Слава: Запрети́вый, Христе́, морски́м ве́тром, и страх учени́ков на ра́дость преложи́вый, запрети́ и ны́не тя́жким боле́знем, тружда́ющим раба́ Твоего́, да вси возвесели́мся, хва́ляще Тя во ве́ки.
И ныне: Изба́ви, Богоро́дице, от обыше́дших ны печа́лей, бед же и скорбей и всех разли́чных неду́г, отра́вы же и чароде́яний и от наве́та злых челове́к, и от напра́сныя сме́рти, мо́лим ти ся.
Песнь 9
Ирмос: На Сина́йстей горе́ ви́де Тя в купине́ Моисе́й, неопа́льно огнь Божества́ заче́ншую во чре́ве; Дании́л же Тя ви́де го́ру несеко́мую, жезл прозя́бший, Иса́ия взыва́ше, от ко́рене Дави́дова.
Ми́лостиве Го́споди, услы́ши моли́тву раб Твои́х, моля́щихся Тебе́.
Исто́чниче жи́зни, пода́телю ми́лости, Христе, не отврати́ лица́ Твоего́ от нас, но обле́гчи боле́зни утружде́нному боле́знию, и воздви́гни его я́коже Фадде́ем Авга́ря, да при́сно Тебе́ сла́вит, со Отце́м и Святы́м Ду́хом.
Ми́лостиве Го́споди, услы́ши моли́тву раб Твои́х, моля́щихся Тебе́.
Ева́нгельскому ве́рующе гла́голу, Твоего́ и́щем обе́щания, Христе́: проси́те бо, рекл еси, и да́стся вам. Тем ны́не просяще мо́лим Тя, возста́ви от одра́ здра́ва лю́тым пове́рженого неду́гом, да Тя с на́ми вку́пе велича́ет.
Слава: Му́чимый неду́гом и внутрь неви́димыми ра́нами, Тебе́, Христе́, на́ми вопие́т: не нас ради, Го́споди, вси бо есмы испо́лнены грехо́в, но Ма́терними и Предте́чи Твоего моли́твами подаждь исцеле́ние боля́щему.
И ныне: Бо́жия Ма́ти Пречи́стая, со все́ми святы́ми призыва́ем Тя, со Ангелы и Арха́нгелы, с проро́ки и патриа́рхи, со апо́столы и святители, с преподо́бными и пра́ведными моли́ся Христу́ Бо́гу на́шему пода́ти здра́вие боля́щему, да Тя вси велича́ем.
Молитва
Бо́же си́льный и милостивый, вся строяй на спасе́ние ро́ду челове́ческому, призри, смиренно молим Тя, на прилежую мольбу нашу и милостивно посети раба́ Твоего́ (имя), нарица́ющаго и́мя Христа́ Твоего́, и отпусти и прости ему вся согрешения вольная же и невольная, всяк же недуг его исцели́ и вся́кое нашествие неприязненное далече от него сотвори . Воздви́гни его от одра́ болезненного, и даруй его́ Святой Твоей Це́ркви здра́ва душе́ю и те́лом, де́лы до́брыми и словесы благими сла́вящаго со все́ми верными Твоими и́мя Христа́ Твоего́, с Ним же благословен еси со Пресвятым и Благим и Животворящим Твоим Духом, ныне и присно, и вовеки веков. Аминь.
Досто́йно есть я́ко вои́стину блажи́ти Тя Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Го́споди, поми́луй. (Трижды).
Го́споди, Иису́се Христе́, Сы́не Бо́жий, моли́твами Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, поми́луй нас.
Ами́нь.
|
